الإنجيل كما كتبه يوحنا

يوحنا 1

1في البداية كان الكلمة، والكلمة كان عند الله، وكان الكلمة الله

2هو كان في البداية عند الله

3كل شئ كان بيهو وبدونو ما في شئ كان من الكان موجود

4فيهو كانت الحياة. والحياة كانت نور الناس

5والنور بيضوي في الضلام ، وَالضلام ما عرفو

6كان فى زول مرسل من الله اسمه يوحنا

7هو جاء عشان يكون يشهد للنور، عشان يؤمن كل الناس بواسطتو

8ما كان هو النور لكن كان شاهد للنور

9النور الحقيقي البينور كل زول كان جاي للعالم

10هو كان في العالم ، و بيهو اتكون العالم ، و لكن العالم ما عرفو

11جاء لناسو وناسو ماقبلو

12والناس القبلو وامنو باسمو هو اداهم الحق انو يبقوا اولاد لله

13وهم ما الاتولدو من دم ولا من رغبة جسد ولا من رغبة بشر لكن من الله

14والكلمة بقي انسان وسكن بيننا وشفنا مجدو مجد كانو الابن الوحيد عند ابو مليان بالنعمة والحق

15يوحنا شهد ليهو وبصوت عالى قال: دا هو الانا قلتا عنو انو جاي بعدى لكن هو كان موجود قبل ما أنا اكون موجود

16من الملء بتاعو انحنا كلنا شلنا نعمة فوق نعمة

17لانو الشريعة جات عن طريق موسى لكن النعمة والحق فجات بيسوع المسيح

18ما في زول شاف الله اصلا, لكن الابن الوحيد القاعد في حضن الآب هو الاتكلم عنو

19ودي شهادة يوحنا لمن اليهود رسلو الكهنة واللاويين بيسالو منو انت ؟

20فاعترف وما نكر، وأكد ليهم و قال:«انا ما المسيح»

21فسألو :«طيب انت منو؟ هل أنت إيليا؟» قال: «انا ما هو!»؛ «ولا انت النبي؟» فردا: «لأ!»

22فقالو: «طيب انت منو، عشان نودي الرد للناس الرسلونا؟ بتقول شنو عن نفسك؟» فقال

23«انا صوت زول بنادي في البرية: اعملو درب بتاع ربنا، زي ما قال النبي إشعياء »

24الناس ديل كانوا مرسلنهم الفريسيين

25فرجعو يسألو تاني: «لو انت ما المسيح، ولا إيليا، ولا النبي، طيب ليه بتعمد؟»

26رد ليهم يوحنا وقال:"انا بعمد بالموية، لكن في وسطكم فى زول مابتعرفو

27هو الجاي بعدي، وبقي قدامي، وانا ما بستحق افك رباط جزمتو

28دا كان في بيت عنيا عبر الأردن محل كان يوحنا بيعمد

29وفي اليوم البعدو يوحنا شاف يسوع جاي عليهو وقال: هو دا حمل الله البيرفع خطية العالم!

30دا القلت عنو بيجي بعدي،و بقي قدامي لأنو كان قبلي

31وانا كنت ما بعرفو ولكن عشان يظهر لاسرائيل انا جيت اعمد بالموية

32ويوحنا شهد وقال: انا شفت الروح نازل زي حمامة من السماء، و أستقرت عليوه

33وانا ما كنت بعرفو ولكن الرسلني عشان اعمد بالموية هو قال لي: البتشوف الروح نزل واستقر عليهو هو البيعمد بالروح القدس

34وانا شفتا دا وبشهد انو دا ابن الله

35و فى اليوم البعدو كان يوحنا واقف مع اتنين من تلاميذو

36فشاف يسوع ماشّي قدامو وقال: " دا ياهو حمل الله!"

37لما التلميذين سمعو كلامو دا، مشوا ورا يسوع

38يسوع التفت ليهم، وشافهم ماشّين وراهو، فسألهم: "إنتو دايرين شنو؟" قالو ليهو: "يا معلم، ساكن وين؟"

39ردّ ليهم: "تعالو وشوفو." فمشو معاهو وشافو المكان الساكن فيهو، وقعدو معاهو في اليوم دا. الساعة كانت تقريباً اربعة العصر

40كان أندراوس، أخو سمعان بطرس واحد من الاتنين المشو ورا يسوع بعد ما سمعو يوحنا

41لمن لقى اخوهو سمعان طوالي قال ليهو: "لقينا المسيا" المعناهو المسيح

42وساقو ليسوع. يسوع عاين شديد لسمعان وقال ليهو: "انت سمعان ابن يونا، ولكن انا بسميك: "صفا" المعناهو صخرة

43وفي اليوم البعدو يسوع كان داير يمشي لمنطقة الجليل، ولاقا فيلبس فقال ليهو "اتبعني"

44وكان فيلبس من بيت صيدا بلد اندراوس وبطرس

45بعد داك فليبس لاقا نثنائيل وقال ليهو: "نحنا لقينا الكتب عنو موسى في الشريعة، والانبياء فى كتبهم و دا يسوع ابن يوسف من الناصرة"

46نثنائيل قال: " في حاجة سمحة بتطلع من الناصرة؟ " فيلبس رد عليهو: " تعال وشوف "

47ويسوع شاف نثنائيل جاي عليهو فقال عنو: "دا اسرائيلي أصيل مافيهو غش"

48نثنائيل سألو: "وإنت بتعرفني من وين؟ "يسوع رد عليهو:" شفتك تحت شجرة التينة قبل ما يناديك فيلبس"

49نثنائيل صرخ وقال: " يا معلم إنت ابن الله! إنت ملك إسرائيل! "

50يسوع قال ليهو: " إنت آمنت لانو قلت ليك انا شفتك تحت شجرة التينة؟ حا تشوف امور اعظم من كدا! "

51وبعد كدا قال ليهو: "الحق الحق انا بقول ليكم انتو حا تشوفو السماء مفتوحة وملايكة الله بيطلعو و بينزلو علي ابن الإنسان

يوحنا 2

1وفي اليوم التالت، كان في عرس في قانا بمنطقة الجليل، وام يسوع كانت هناك

2وبرضو عزمو يسوع للعرس وتلاميذو

3ولمن انتهت الخمر، ام يسوع قالت ليهو:" ما فضل ليهم خمر تاني "

4رد ليها: "مالك معاي يا امراة ؟ وقتي لسا ما جاء !"

5وامو قالت للخدم " اعملو كل حاجة بيقولا ليكم "

6كانت هناك ستة ازيار من الحجر بستعملوها اليهود لموية التطهير، الواحدة منهم بتشيل ما بين جالونين لتلاتة (يعني ما بين ثمانين لي مئة وعشرين لتر)

7وقال يسوع للخدم " املو الازيار موية" وملوها لحدي ما قربت تدفق

8وقال ليهم: " بعد داك، اغرفو منها وقدمو لمشرف الوليمة ! " وقدموها

9لمن المشرف ضاق الموية الاتحولت لي خمر وما كان عارف جابوها من وين، لكن الخدم عشان قدموها كانوا عارفين. نادى العريس

10وقال ليهو: "الناس كلهم بيقدمو الخمر الكويسة في الاول وبعد ما الضيوف يسكرو بيقدمو الما كويسة لكن انت خليت الخمر السمحة في لحدى هسى

11المعجزة دي أول معجزة عملا يسوع في قانا الجليل وتلاميذو شافو مجدو وآمنو بيهو

12بعد داك يسوع وامو واخوانو وتلاميذو مشو لمدينة كفر ناحوم وقعدو هناك كذا يوم

13لمن قرب عيد الفصح اليهودي مشي يسوع لاورشليم

14ولقي في الهيكل تجار البقر والغنم والحمام وتجارالعملة قاعدين في طرابيزهم

15وفتل سوط من الحبال وطردم كلهم من الهيكل مع الغنم والبقر، وشتت قروش تجار العملة وقلب طرابيزم

16وقال لبياعين الحمام: "طلعو الحمام من هنا وما تعملو بيت ابوي مكان للتجارة"

17وتلاميذو اتذكرو أنو مكتوب في الكتاب " الغيرة علي بيتك اكلتني."

18فاتصدا اليهود ليسوع وقالو ليهو:"ادينا آية تثبت بيها سلطانك الخلاك تعمل كدا."

19يسوع رد عليهم:" أهدمو الهيكل دا وانا في تلاته ايام ببنيهو."

20واليهود قالو ليهو: الهيكل دا بنوهو في سته واربعين سنه. وانت تبنيهو في ثلاثة ايام؟

21ولكن هو كان بيقصد هيكل جسدو

22وبعد داك لمن قام من بين الاموات، تلاميذو اتذكرو كلامو دا وامنو بالكتاب والكلام القالو يسوع

23ولمن كان في أورشليم في عيد الفصح آمن كتيرين باسمو لأنهم شافو العجائب العملها

24لكن يسوع ما استأمنم على نفسو، لانو كان بيعرفم كلهم

25ولانو ما كان محتاج لزول يشهد ليهو عن الانسان، لانوكان عارف ما بداخل الانسان

يوحنا 3

1في زول من الفريسيين، أسمو نيقوديموس، وهو عضو في المجلس اليهودي

2جا ليسوع بلليل وقال ليهو: " يا معلم، نحن بنعرف انك جيت من الله تعلم، لانو ما في زول بيقدر يعمل الآيات الانت بتعملا الا إذا كان الله معاو "

3رد ليو يسوع: " الحق الحق اقول ليك: مافي زول بيقدر يشوف ملكوت الله إلا إذا اتولد من جديد"

4فسالو نيقوديموس: " كيف ممكن الانسان يتولد وهو كبير فى السن؟ و للا هو فى زول بيقدر يدخل بطن امو تاني و يتولد؟ "

5رد ليهو يسوع :" الحق الحق اقول ليك: مافي زول بيقدر يدخل ملكوت الله إلا إذا اتولد من المويه والروح

6المولود من الجسد هو جسد والمولود من الروح هو روح

7ما تستغرب اذا قلت ليك انكم محتاجين للولادة من جديد

8الريح بتهب زي ما دايرة وتسمع صوتا، ولكن ما بتعرف جاية من وين ولا ماشة لوين. و كمان كدا كل زول اتولد من الروح "

9ورجع نيقوديموس يسال: " كيف بيكون الكلام دا؟

10رد ليهو يسوع:" انت معلم إسرائيل وما تعرف دا!"

11الحق الحق اقول ليك نحن بنتكلم بالشئ البنعرفو و بنشهد بالشئ البنشوفو، وأنتو ما بتقبلو شهادتنا

12اذا كان انا كلمتكم بالأمور الارضية و انتو ما بتؤمنوا، كيف تؤمنوا لو كلمتكم بأمور السماء؟

13و ما زول طلع السماء إلا الذي نزل من السماء، و دا هو ابن الإنسان الفي السماء

14و ذي ما موسي علق الحية في البرية ،بنفس الطريقة لأزم يتعلق ابن الإنسان

15عشان تكون الحياة الابدية لكل زول بيؤمن بيهو

16لانو للدرجة دى أحب العالم لحى ما قدم إبنو الوحيد عشان ما يهلك أى زول بيؤمن بيهو، لكن عشان تكون ليهو الحياة الابدية

17لكن الله ما رسل إبنو للعالم عشان يدين العالم، لكن عشان يخلص بيهو العالم

18الزول البيؤمن بيهو ما بيدان، لكن الزول الما بيؤمن بيهو صدر عليهو حكم الدينونة، لأنو ما آمن بإسم ابن الله الوحيد

19ودا ياهو الحكم: انو النور جاء للعالم لكن الناس حبو الضلام اكتر من النور عشان اعمالم كانت شريرة

20فكل زول بيعمل الشر بيكره النور وما بيجي ليهو عشان بخاف اعمالو تتفضح

21لكن الزول البيمشي في الحق بيجي للنور عشان اعمالو تظهر وتبين انها اتعملت بقوة الله

22ومشي يسوع وتلاميذو بعد كدا لبلاد اليهودية وقعد معاهم وبقي يعمد

23وكان يوحنا برضو بيعمد في عين نون قريب من ساليم عشان الموية هناك كانت كتيرة وكان الناس بيجو وبتعمدو

24يوحنا كان لسه ما دخل السجن

25وحصل نقاش بين تلاميذ يوحنا وواحد من اليهود في موضوع التطهير

26فمشوا ليوحنا وقالوا ليهو يامعلم الراجل الشفناهو معاك ورا نهر الاردن والانت شهدت ليهو هو كمان بيعمد والناس كلهم بتحولوا ليهو

27رد ليهم يوحنا وقال: "ما في زول بيقدر يشيل حاجة الا اذا ادوها ليهو من السماء!

28انتو زاتكم بتشهدو لى انا قلت: انا ما المسيح أنا رسول اجهز ليهو الطريق

29العندو العروس ياهو العريس لكن صديق العريس الواقف جنبو وبيسمعو و بيفرح شديد عشان سمع صوت العريس و بكدا انا فرحى تم

30فلازم انو هو يذيد وانا انقص. البيجى من فوق هو فوق الكل و لكن الكان من الارض هو ارضي و بيتكلم كلام ارضى

31الجاى من فوق هو فوق الكل

32و هو بيشهد بالسمعو و شافو و ما في زول بيقبل شهادتو

33والبيقبل شهادتو بيصدق انو الله حق

34لانو الرسلو الله بيتكلم بكلام الله والله بيدى الروح ما بالكيل

35الآب بيحب الابن، و خلى كل شي في يدو

36‏أي زول بيؤمن بالابن، حيلقى الحياة الأبدية. وَ البيرفض يؤمن بالابن، ما حيشوف الحياة الأبدية. لكن ينزل عليهو غَضَبُ اللهِ»

يوحنا 4

1لما الرب عرف انو الفريسيين سمعو انو بيعمل تلاميذ و بيعمد أكتر من يوحنا

2مع انو يسوع ما كان هو البيعمد بي نفسو، لكن تلاميذو هم الكانو بيعمدو

3ساب منطقة اليهودية و رجع لمنطقة الجليل

4وكان لازم يعدي بمنطقة السامرة

5فوصل لقرية اسمها سوخار، قريبة من المكان الأداها يعقوب لولدو يوسف

6المكان الفيهو بِير يَعْقُوبَ. و لمن يسوع تعب من السفر، قعد في طرف البير، الساعة كانت حوالي ستة

7وجات مرا سامربة للبير عشان تشيل موية, قال ليها يسوع: "اسقيني"

8لانو تلاميذو كانو مشوا للقرية عشان يشترو اكل

9المرا السامرية قالت ليو: "انت يهودي وانا سامرية، كيف تقول لي اسقيك؟" لان اليهود ما كانو بيتعاملو مع أهل السامرة

10يسوع رد ليها: " لو كنتى بتعرفى عطية الله، ومنو هو البيقول ليكى اسقيني، كنتى انتي الطلبتى منو واداكي موية حية!"

11المرا قالت ليو: " لكن يا سيد ما عندك دلو، والبير غريقة. من وين تجيب الموية الحية؟

12هل انت أعظم من ابونا يعقوب الورثنا البير دى، وشرب منها هو وعيالو وبهابمو؟ "

13يسوع قال ليها:" كل زول بيشرب من الموية دي بيعطش تانى

14ولكن البيشرب من الموية البديها ليهو انا ما بيعطش بعد كدا ابدأ، لكن الموية البديها ليهوبتبقى جواهو ينبوع ييدفق و يديهو حياة أبدية "

15والمرا قالت ليهو : ياسيدي اديني من الموية دي عشان ما اعطش تاني ولا اجي هنا تاني عشان اشرب. ويسو

16ففقال ليها: امشي ونادي راجلك وتعالي هنا" . والمرا

17ردت وقالت: "ما عندي راجل!" فقال ليها: انتى صادقة لانك قلتى: ما عندي راجل

18لانو كان عندك خمسة رجال، والعايشا معاهو هسي ما راجلك ودا انتى قلتيهو بصدق!

19والمرا قالت ليهو : يا سيد، انا شايفاك انت نبي

20ابهاتنا عبدو الله في الجبل دا، وانتو اليهود بتقولو انو اورشليم هو المكان المفروض نسجد ونعبد فيهو

21ويسوع قال ليها: " صدقيني يا مرا انو حيجي وقت لا في الجبل دا، ولا في اورشليم تسجدوا للآب

22انتو بتسجدو للمابتعرفو لكن نحنا بنسجد للبنعرفو. لان الخلاص بيجي من اليهود

23لكن حا يجي وقت وهو هسى، الفيهو بيعبد العابدين الحقيقييين الآب بالروح والحق، لانو الله عايز ناس زى ديل يعبدو

24الله روح، والناس البيعبدو لازم يعبدو بالروح والحق

25قالت ليهو المرا: "أنا بعرف إنو المسيّا، البقولو ليهو المسيح، جاي. ولما يجي، حا يورينا كل شي."

26رد ليها: " دا أنا هو البتكلم معاكي! ."

27في الوقت دا، تلاميذو وصلو، واستغربو لما شافو بيتكلم مع مرا. لكن ما في زول منهم سألو عايزا شنو منو؟" أو "لييه بيتكلم معاها؟"

28المرا خلت الجرّة بتاعتا ورجعت القرية وبدت تقول للناس

29"تعالو شوفو في زول ورانى كل الحاجات العملتا. ممكن يكون دا المسيح؟"

30ناس قرية سوخار طلعو كلهم ومشو ليهو

31وفي نفس الوقت كان التلاميذ بيطلبو منو انو يأكل و قالو ليهو:آيا معلم أكل

32و رد ليهم " عندي اكل باكلو إنتو ما بتعرفهو

33و طوالي بدا التلاميذ يتسألو بيناتهم: " هو في زول جاب ليهو أكل ؟"

34يسوع قال ليهم:"أكلي انو اعمل إرادة الرسلني واكمل عملو

35مش انتو بتقولو: بعد أربعة شهور بيجي وقت الحصاد! ولكن أنا بقول ليكم: شوفو الحقول كويس، لانها نجضت و جا وقت حصادا". و

36البيحصد بياخد أجرتو، ويجمع الثمار للحياة الأبدية، الزول الزرع والزول الحصد حا يفرحو سوا

37عشان يصدق القول: واحد بيزرع، و واحد تاني بيحصد

38انا رسلتكم عشان تحصدو الما تعبتو فيهو، غيركم تعب، وإنتو حصدتو ثمار تعبهم

39فامن بيهو كتار من السامريين ناس البلد ديك عشان كلام المرا الكانت بتشهد و بتقول:وراني كل الحاجات الانا عملتا

40ولمن قابلو جنب البير طلبو منو يقعد معاهم، فقعد هناك يومين

41و الناس الامنو بيهو بيقو كتار جدًا بسبب كلامو

42وقالو للمرا: انحنا بعد ما آمنا بسبب كلامك. لكن نحنا سمعناهو بنفوسنا وعرفنا انو هو بالحقيقة المسيح مخلص العالم

43و بعد ما قعد يومين في سوخار، يسوع مشى لمنطقة الجليل

44و يسوع نفسو شهد و قال: مافي نبي عندو كرامة في بلدو

45و لما وصل الجليل اهلها رحبو بيوهو، لانو كانو شافو الحاجات العملا في اورشليم في وقت عيد الفصح، وهم برضو مشو للعيد

46و جا يسوع قانا الجليل، المكان الحول فيهو الموية لخمر. وكان في زول كفرناحوم من خدام ولدو عيان

47ولمن سمع انو يسوع طلع من اليهودية وجاء للجليل، مشي ليهو وطلب منو يمشي معاهو لي كفر ناحوم عشان يشفي ولدو القرب يموت

48يسوع قال ليهو: ما بتآمنو الا لمن تشوفو المعجزات والعجائب

49واتوسل ليهو الراجل وقال: ياسيد أمشى معاي قبل ما ولدي يموت

50يسوع رد ليهو: امشي, ولدك حي. و الراجل أمن بالكلام القالو ليهو يسوع ومشا

51وأثناء ما كان ماشي في الطريق لاقوهو عبيدو و قالو ليهو ولدك حي و

52سالهم: ( في ياتو وقت بقى كويس ؟) و ردو ليهو: امبارح الساعة سبعة مساء الحمة راحت منو

53و الأبو عرف انو د نفس الوقت القال ليهو فيهو يسوع (ولدك حي) و آمن هو وناس بيتو كلهم

54دي معجزة تانية عملها يسوع بعد ما طلع من اليهودية ومشي الجليل

يوحنا 5

1وبعد كدا مشى يسوع لاورشليم في واحد من الاعياد اليهودية

2وكان قريب من باب الغنم في اورشليم بركة اسمها باللغة العربية بيت حسدا، حولها خمس قاعات

3ببيرقد فيها ناس عيانين كتارو عماينين وعرج ومشلولين، كانو بينتظرو موية البركة تتحرك

4لانو في كان فى ملاك بيجي من وقت لوقت و يحرك موية البركة، وكان الزول البنينزل فبها اول بيشىفى مهما كان مرضو

5وكان جنب البركة زول مريض ليهو ثمانية وثلاثين سنة

6يسوع شافو راقد هناك و عرف انو ليهو مدة طويلة فى الحالة دى، سالو: " انت داير تشفى؟"

7رد ليهو المريض: " يا سيد ما عندي زول بينزلنى في البركة لمن الموية تتحرك، وكم مرة حاولت انزل، و كان دايما فى زول بينزل قبلي"

8يسوع قال ليهو: قوم شيل فراشك وأمشي

9طوالي الزول لقى الشفاء و شال فراشو و مشي، و اليوم داك كان يوم السبت

10اليهود قالو للزول البقي كويس: اليوم دا يوم سبت و ما مسموح ليك تشيل فراشك وتمشي

11رد ليهم و قال: الزول الشفاني قال لي شيل فراشك وأمشي

12فسألو: منو دا القال ليك شيل فراشك و أمشي؟

13لكن المريض البقي كويس ما كان بيعرف دا منو لان يسوع كان مشى بعيد، عشان المكان فيهو ناس كتيرة

14وبعد كدا يسوع لقاهو في الهيكل وقال ليهو: شوف ياهو انتا بقيت كويس, ما ترجع تانى للخطية عشان ما يجيك الاسوا

15ولمن الزول عرف انو يسوع ياهو الشفاهو مشى بسرعة و ورا اليهود انو دا يسوع الشفاهو

16و اليهود بقو يضايقو يسوع عشان هو بيعمل الأعمال دى يوم السبت

17لكن يسوع قال ليهم: ابوي قاعد يعمل لحدى هسي. وأنا برضو بعمل

18عشان كدا اليهود كانو عندهم رغبة شديدة يكتلو، ما عشان هو خالف شريعة السبت لكن عشان قال انو الله ابوهو, مساوي نفسو بي الله

19يسوع قال ليهم الحق الحق اقول ليكم انو الابن مابيقدر يعمل حاجة من نفسو لكن بيعمل الشاف الآب بيعملو واى حاجة بيعملا الاب الابن برضو بيعملا

20لانوالآب بيحب الابن، و بيوريهو كل شي بيعملو، و برضوا حيوريهو أعمال اعظم من العمل دا، لغاية ما تتعجبو

21‏زي ما الاب بيقويم الميتين و بيحييهم، برضو الابن بيحيي زي ما هو داير

22الاب ما بيدين زول، لكن ادّا الابن سلطة القضاء كلها

23عشان الناس كلهم يكرمو الابن زي ما بيكرموا الآب. و أى زول ما بيكرم الابن ما بيكرم الاب الرسّلو

24الحق الحق اقول ليكم الزول البيسمع كلامي وبيؤمن بالرسلني ليوهو حياة ابدية، وما بيتحاكم في اليوم الأخير، لانو بيكون انتقل من الموت للحياة

25الحق الحق اقول ليكم: حتجي الساعة البيسمع فيها الأموات صوت ابن الله لكن و هى جات الآن والناس البيسمعوهو بيحيو

26و زي ما الأب عندو حياة فى ذاتو، كمان ادا الإبن أنو تكون ليهو حياة فى ذاتو

27و كمان اداهو سلطة انو يدين، لانو هو ابن الانسان

28ما تستغربو من دا لانو حياجي وقت كل الناس الفي القبور حا يسمعو صوتو

29و يطلع الناس العملو الصالحات لقيامة الحياة والعملو السئيات لقيامة الدينونة

30انا ما بقدر ان اعمل شئ من نفسي. زي ما أنا بسمع بحكم, و حكمي عادل لاني ما بطلب مشيئتي لكن مشيئة الآب الرسلني

31واذا كنت بشهد لنفسي فشهادتي ما صحيحة

32و لكن غيرى بيشهد لى و انا عارف انو شهادتو لي هي حق

33إنتو كان رسلتو لي يوحنا، وهو شهد للحق

34لكن أنا ما بقبل شهادة من زول لكن بقول الكلام دا عشان تلقو الخلاص

35يوحنا كان زي المصباح المضوي، وإنتو كنتو دايرين تفرحو بنورو مدة من الزمن

36لكن أنا عندي شهادة أعظم من شهادة يوحنا. ودي شهادة الأعمال الأداني ليها الآب عشان اعملا و العمل الانا بعملو بيشهد لي و بيورى انو الاب هو الرسلني

37والآب الرسلني هو زاتو بيشهد لي. وانتو ما سمعتو صوتو و ما شفتو شكلو

38ولا كلامو ثبت في قلوبكم لانو انتو ما صدقتو الرسلو

39فتشو في الكتب لانو انتو بتعتقدو انو عندكم فيها حياة أبدية والكتب تشهد لي

40وانتو رفضتوا تجو لي عشان تلقوا الحياة

41أنا ما داير مجد من الناس

42لكن أنا غرفتكم و عرفتا انو محبة الله ما موجودة فى نفوسكم

43أنا جيت باسم أبوي وما قبلتوني، لكن لو جا زول باسم نفسو بتقبلو

44كيف تقدرو تؤمنو بي وانتوا بتقبلو المجد من بعضكم و المجد المابيديهو الا الله ما بتطلبو

45ما تظنو انو أنا بشتكيكم للاب، لانو البيشتكيكم و هو موسى الانتو علقتو املكم عليهو

46و لو كنتو صدقتو موسي كنتو صدقتوني لانو هو كتب عني

47ولو انتو ما بتصدقو الكتبو موسي فكيف تصدقو كلامي

يوحنا 6

1بعد داك عبر يسوع بحيرة الجليل، او بحيرة طبرية، للضفة المقابلة

2وتبعو ناس كتار بعد ما شافو معجزات شفا المرضى

3وطلع يسوع وتلاميذو الجبل وقعدو

4وكان عيد الفصح اليهودي قرب

5ويسوع عاين وشاف ناس كتار جايين عليهو. قال لفيلبس " من وين نشتري خبز عشان ناكل ديل كلهم؟"

6وهو قال كدا عشان يمتحنو. لانو يسوع كان عارف هو حيعمل شنو

7رد ليهو فيلبس : " حتى لو اشترينا عيش بميتين دينار ما بيكفي عشان كل واحد يلقى قطعة صقيرة من الخبز!"

8واحد من التلاميذ اسمو اندراوس، اخو سمعان بطرس قال ليهو

9في ولد هنا معاهو خمسة رغيفات شعير وسمكتين صغيرات. ولكن دا بيعمل شنو للناس الكتار ديل؟"

10و قال ليهم يسوع: خلو الناس تقعد و كان في المكان داك قش كتير و قععدو الناس و كان عدد الرجال خمس ألف تقريبا

11يسوع شال الرغيف و شكر الله ووزع علي التلاميذ و التلاميذ وزعوها على القاعدين و برضو من السمكتين ذي ما دايرين

12فلما الناس شبعت قال يسوع لتلاميذو: لمو الفضل من الاكل عشان ما يتلف منو حاجة

13و جمعو الباقي و ملأو اتناشر قفة من الأكل من الخمسة رغيفات شعير الفضلت من الناس الاكلو

14و لما الناس شافت المعجزة العملا يسوع قالو: بالحقيقة دا ياهو النبي الجاي للعالم

15و لكن لما يسوع عرف انو هم دايرين يمسكو و يبقو ملك عليهم، و رجع للجبل براو

16ولما جاء المساء نزل تلاميذو للبحيرة

17وركبو مركب واتجهو لكفرناحوم في الضفة التانية والواطة بقت ضلام ويسوع لسه ما لحقهم

18وهبت عاصفة قوية وهاجت البحيرة

19بعدما جدف التلاميذ زى تلاتة او اربعة اميال شافو يسوع يقرب من المركب و هو ماشي فوق الموية في البحيرة و خافو

20و شجعم يسوع وقال ليهم انا ياهو ما تخافو

21و لما رضو انو يركب معاهم فى المركب وصل المركب للمكان المقصود حالا

22وفي اليوم البعدو الجمع الكانو واقفين فى الضفة التانبة من البحيرة مالقوا غير مركب واحد وكانوا عارفين انو يسوع ما ركب مع تلاميذو في المركب امبارح لكن التلاميذ ركبوا براهم

23بعد داك جات مراكب تانية من طبرية ورست جنب المكان الاكلو فيهو الرغيف بعد ما شكرو ربنا عليهو

24ولمن الجموع ما لقو يسوع ولا تلاميذو هناك ركبو المراكب ديل وجو لي كفرناحوم يفتشو على يسوع

25ولمن لقوهو في الضفة الجنب البحيرة قالو ليهو: "يا معلم انت وصلت هنا متين ؟ "

26رد عليهم يسوع وقال:" الحق الحق اقول ليكم انتو بتفتشو على ما عشان شفتو المعجزات لكن عشان انتو اكلتو وشبعتو من الرغيف داك

27ما تعملو للاكل البنتهي, لكن أعملو للأكل البدى الحياه الابديه البديكم ليهو ابن الانسان. لانو الاكل دا الله الاب ختمو عليهو"

28قامو سالوهو: " نعمل شنو عشان نعمل العمل البطلبو الله؟"

29رد يسوع: "العمل الطالبو الله هو انكم تؤمنو بالرسلو هو". قالو ليهو: « دي ياتو معجزة الممكن تعملها عشان نشوفها و نؤمن بيك؟ انت بتقدر تعمل شنو؟

30قالو ليهو: « دي ياتو معجزة الممكن تعملها عشان نشوفها و نؤمن بيك؟ انت بتقدر تعمل شنو؟

31ابهاتنا اكلوا المن في البرية زي ما الكتاب بيقول: اداهم خبز من السماء عشان يأكلو!

32" يسوع ردليهم: « الحق الحق انا بقول ليكم: موسى ماهو الاداكم خبز من السماء، لكن ابوي هو البيديكم الخبز الحقيقى من السماء

33خبز الله هو النازل من السماء البيدي حياة للعالم

34قالوا ليهو: « يا سيد، أدينا الخبز دا كل مرة»

35يسوع قاليهم: « انا ياهو خبز الحياة البيجيني ما بيجوع و البيؤمن بي ما بيعطش أبداً

36و لكن أنا قولتا ليكم انتو شفتوني و ما آمنتو

37كل شئ بيديني ليهو الاب بيجي لي، والبجيي لى ما بطلعو بر

38لانو أنا جيت من السماء ما عشان اعمل مشيئتي، لكن عشان اعمل مشيئة الرسلني

39ودي مشيئة الاب الرسلني: انو الاداني ليهو ما افقد منو حاجة، عشان اقومو في اليوم الاخير لانو

40دي مشيئة الرسلني: انو كل زول يشوف الابن ويؤمن بيهو بيكون عندو حياة ابدية. وانا بقومو في اليوم الاخير"

41اليهود اتذمرو واحتجو عليهو لانو قال:" انا ياهو الخبز النازل من السماء "

42وقالو:" دا ما ياهو ولد يوسف واحنا عارفين ابو وامو؟ فكيف يقول الكلام دا: انا جيت من السماء؟ "

43ويسوع قال ليهم: ما تتذمرو بيناتكم

44ما في زول بيقدر يجي لي، إلا لو ما الآب ادّاني ليهو هو الجابو لى، وأنا حأ أفّومو في اليوم الأخير

45مكتوب في كتاب الأنبياء: " انو الناس كلّهم حيتعلّمو من الله"، وأي زول سمع من الآب واتعلّم، بيجيني

46ما في زول شاف الآب، إلا الزول الجا من عند الله، هو الوحيد الشاف الآب

47الحقّ الحقّ بقول ليكم، الزول البيؤمن بيّ عندو حياة أبدية

48أنا ياهو خبز الحياة

49آبهاتكم اكلّو المن في البرية، لكنهم ماتو

50دا ياهو الخبز الخبز النازل من السما، عشان الزول البياكل منو، ما يموت

51أنا ياهو الخبز الحي النزل من السماء. إذا اكل واحد من الخبز دا يحيا للأبد. والخبز الأنا بديهو، دا جسدي، بديهو عشان يحيا العالم

52الكلام دا خلى اليهود يتخاصمو بيناتهم, و قالو:" كيف دا يقدر يدينا جسدو عشان ناكلو؟ "

53رد ليهم يسوع:" الحق الحق اقول ليكم: لوانتو ما أكلتو جسد ابن الانسان وشربتو دمو ما بيكون عندكم حياة جواكم

54الزول البياكل جسدي ويشرب دمى عندو حياة أبدية وانا اقومو في اليوم الأخير

55لان جسدي هو الطعام الحقيقي

56وكل زول بياكل جسدي ويشرب دمى يثبت فينى وانا فيهو

57وزي ما انا أحيا بالآب الحي الرسلني فكمان يحيا بي الزول اليياكلى جسدى

58دا ياهو الخبزالنزل من السماء وهو ما زي المن الأكلو آبهاتكم وماتو. الزول البيأكل الخبز دا بيحيا للأبد

59يسوع قال الكلام دا كلو لمن كان بيعلم في المجمع في كفرناحوم

60فلما سمعو كتير من تلاميذو قالو: الكلام دا صعب, منو بيقدر سمعو؟

61فعرف يسوع في نفسو ان تلاميذو بيتذمرو فقال ليهم: دا ياهو البيخليكم تتعثرو؟

62حا تعملو شنو لو شفتو ابن الإنسان طالع للمكان الكان فيهو فى الأول؟

63الروح هو البيدي الحياة، أما الجسد ما بيفيد حاجة. الكلام الكلمتكم بيهو هو روح وحياة

64لكن بعض منكم ما بيؤمن! يسوع كان عارف من البداية منو هم البيؤمنو بيهو و منو هو البيخونو

65بعد داك قال: عشان كدا قلتا ليكم مافى زول بيقدر يجينى الا اذا الآب ادانى ليهو

66من الوقت داك رجع كتير من اتباعو ومابقو يتبعوهو

67وقال للتلاميذ الاطناشر: " وانتو دايرين تمشوا برضو؟ "

68ردا ليهوسمعان بطرس: " لي منو نمشي يارب وعندك كلام الحياة الأبدية

69نحنا أمنا وعرفنا انك قدوس الله !"

70يسوع قال: "مش دا أنا الاخترتكم انتو الاطناشر لكن و احد منكم فيهو شيطان"

71و كان بيقصد يهوذا ولد سمعان الاسخريوطي السلمو بعد كدا مع انو كان من الاطناشر!

إرسال ملاحظة عن النص

لو لاحظت كلمة أو جملة محتاجة مراجعة، أرسل الملاحظة هنا. هذا النموذج مخصص فقط لملاحظات الدقة والوضوح في النص.